Mësohet se kur dalin shtesat e fëmijeve me rritje

Burime brenda Ministria e Financave e Kosovës kanë bërë të ditur për Gazetën Minuti se ekzekutimi i pagesave të shtesave për fëmijë me vlerat e reja të rritura pritet të realizohet gjatë muajit të ardhshëm, duke përfshirë edhe shumën që i takon muajit mars.

Sipas këtyre burimeve, rritja e paralajmëruar nga Lëvizja Vetëvendosje nuk do të vlejë njësoj për të gjitha kategoritë e përfituesve. Konkretisht, shtesa prej 90 eurosh nuk është e destinuar për të gjithë fëmijët nën moshën 16-vjeçare, por vetëm për ata që vijnë nga familje me tre ose më shumë fëmijë.

Ndërkaq, për familjet që kanë një ose dy fëmijë, sipas planifikimit aktual, shtesat mujore pritet të arrijnë në 60 euro për secilin fëmijë nën 16 vjeç, duke reflektuar rritjen e premtuar për muajin mars.

Në këtë mënyrë, skema e re e përfitimeve parashikon dyfishimin e vlerës ekzistuese të shtesave për fëmijë. Kjo nënkupton se pagesat prej 30 eurosh për fëmijët e familjeve me një ose dy fëmijë do të rriten në 60 euro, ndërsa për familjet me tre apo më shumë fëmijë, shuma prej 45 eurosh do të dyfishohet në 90 euro për secilin fëmijë.

Burimet theksojnë gjithashtu se ekziston mundësia që diferenca e mbetur për muajin mars të ekzekutohet më herët, madje para se të realizohet pagesa e plotë për muajin prill, çka do të sillte një lehtësim më të hershëm financiar për familjet përfituese.

Megjithatë, pavarësisht këtyre zhvillimeve, një konfirmim zyrtar nga institucionet përkatëse ende nuk është bërë publik. Qytetarët mbeten në pritje të një njoftimi formal nga Ministria e Financave e Kosovës për datën e saktë të ekzekutimit të pagesave dhe detajet përfundimtare të zbatimit të kësaj skeme.